УИХ-ын гишүүн асан Ж.Эрдэнэбат, Н.Номтойбаяр нарт холбогдох эрүүгийн хэргийг Улсын Дээд шүүхийн Эрүүгийн хэргийн танхимын хяналтын шатны шүүх хуралдаанаар энэ сарын 8-ны өдөр буюу энэ баасан гаригт хэлэлцэхээр товложээ. Ж.Эрдэнэбат шүүх хуралд өөрийн биеэр оролцох хүсэлтийг тавиад байгаа билээ. Иргэд ч олон нийтийн сүлжээнд шүүх хурлыг нээлттэй явуулахыг шаардаж байна.
Н.Номтойбаярт Чингэлтэй дүүргийн эрүүгийн хэргийн анхан шатны шүүхээс нийтийн албанд томилогдох эрхийг таван жилийн хугацаатай хасаж таван жил таван сар хорих ял оноосон байсан ба Давж заалдах шатны шүүхээс ялыг хэвээр үлдээгээд байсан юм. Хэргийг ахин сануулахад Хөдөлмөр нийгмийн хамгааллын сайд, Хөдөлмөр эрхлэлтийн үндэсний зөвлөлийн даргаар ажиллаж байхдаа эрх мэдлээ урвуулж, тогтоол гарган, орон нутаг, нийслэлийн онцлог, хэрэгцээнд нийцүүлсэн нэгж төслийн төсөв өртгийг 200 сая төгрөгт багтаан, нээлттэй зарлах удирдамж баталсан зэргээр гэм буруутайд тооцсон билээ. Харин Ж.Эрдэнэбатад өнгөрсөн оны долоодугаар сард Сүхбаатар дүүргийн Эрүүгийн хэргийн анхан шатны шүүхээс нийтийн албанд томилогдох эрхийг зургаан жилээр хасаж, зургаан жил хорих ял оногдуулсан бөгөөд Давж заалдах шатны шүүхээс ялыг хэвээр үлдээсэн байв.
Түүнийг улс төрд нөлөө бүхий этгээд өөртөө болон бусдад давуу байдал бий болгож, эрх мэдэл, албан тушаалын байдлаа ашиглах гэмт хэргийг зохион байгуулагчаар хамтран оролцсон гэм буруутайд тооцсон юм. УИХ-ын гишүүн Э.Эрдэнэбатыг хувьд өнгөрсөн сонгуулийн дүн гарч УИХ-ын гишүүнээр сонгогдчихоод байхад нь баривчлан саатуулсан. Түүнийг Сүхбаатар дүүргийн шүүхийн захирамжаар шүүхэд дуудсан бичгийг анх 2020 оны зургадугаар сарын эхээр гаргаж, улмаар 10 тэрбум төгрөг байршуулахгүй бол албадан саатуулах захирамж гаргасан билээ. Гэвч түүнийг Сонгуулийн тухай хууль, УИХ-ын тухай хууль, Үндсэн хуульд заасан зохих заалтуудыг зөрчин хүчээр албадан саатуулж, улмаар 2 төрлийн үндэслэлээр буруутгасан. Тэрбээр энэ шийдвэрийг үл зөвшөөрөн Улсын дээд шүүхэд давж заалдахаа мэдэгдээд байгаа билээ.
