Сэлэнгэ аймгийн Онцгой комиссын дарга Ш.Оргил өнөөдрийн цаг үеийн мэдээллийг өглөө.
Тэрээр:Монгол Улсын Засгийн газрын шийдвэрээр Бүх нийтийн бэлэн байдлын зэрэг, хатуу хөл хорионы дэглэм Сүхбаатар, Алтанбулаг суманд хэвээр мөрдөгдөж байна. Иймээс дээрх сумын иргэд гадуур гарахгүй байхыг анхааруулья.
“Ковид 19” халдварыг илрүүлэх түргэвчилсэн оношлуураар Сүхбаатар суманд 19.2 мянга, бусад суманд 21.6 мянга, нийт 40.8 мянган иргэнийг хамруулаад байна. Сумдын бүсчилсэн цэгүүдэд 469 иргэнийг түргэвчилсэн оношлуураар шинжилгээнд хамруулж, зорчих хөдөлгөөнд оролцуулжээ.
Өнөөдрийн байдлаар аймгийн Нэгдсэн эмнэлгийн Ковидын тасагт эмчлүүлж буй 20 өвчтөний биеийн байдал хөнгөн, эмчилгээ хэвийн үргэлжилж байгаа аж. Энд хүүхэд тав, насанд хүрэгсэд 15 байна. Коронавирусний халдварыг эмчилснээс хойш 14 хоногт нийт найман өвчтөн хоёр дахь давтан шинжилгээгээ өгч хариу нь сөрөг гарсан байна. Өмнөх батлагдсан тохиолдлын ойрын болон дам хавьтлыг судлах, эцэслэн тогтоох чиглэлээр цагдаа, тагнуулын байгууллага хамтран ажиллаж, тандалтын багт мэдээллийн дэмжлэг үзүүлэн ажиллаж байна. Ойрын хавьтал 1447, дам 935, нийт 2382 хавьтлыг тогтоон тандалт судалгааны ажил үргэлжилж байна.
Аймгийн хэмжээнд 10 ажиглалтын байр, нэг тусгаарлах байранд 111 иргэн хяналтад байна. Улсын Онцгой комиссын зөвшөөрлийн дагуу Алтанбулаг автозамын боомтоор 15 монгол жолоочийг татан авч Дархан-Уул аймагт тусгаарлалтад оруулжээ. Мөн Сүхбаатар өртөөний шалган нэвтрүүлэх боомтоор улсын хилээр орох, гарах чиглэлд ачаа тээврийн 12 галт тэрэгний 547 вагон, 24 ажилтныг шалган нэвтрүүлсэн байна. Түүнчлэн Сүхбаатар өртөөний ачаа тээврийн цех, захиргааны хэсэг, вокзал, өртөөний байр, амрах байр, Авто тээврийн газар, автобус, Алтанбулаг авто замын шалган нэвтрүүлэх боомтод нийт 2400 м/кв талбайд голомтын болон эцсийн халдваргүйжүүлэлтийг хийлээ хэмээн мэдээллээ.
