Коронавирусийн халдварт цар тахлын нөхцөл байдлын талаар Эрүүл мэндийн яамнаас мэдээллээ.
Сүүлийн 24 цагт улсын хэмжээнд хийгдсэн коронавирус илрүүлэх шинжилгээний хариуг ХӨСҮТ-ийн Тандалт, судалгааны албаны дарга А.Амбасэлмаа танилцууллаа.
Тэрбээр “Арванхоёрдугаар сарын 28-нд хийсэн шинжилгээнүүдээс 38 хүний сорьцод коронавирус илэрлээ. БЗД-ийн голомтоос 36 хүний шинжилгээнд коронавирус илэрсэн байна. 38 хүний нэг нь цэргийн төв эмнэлгийн сувилагч, нэг нь зөөвөрлөгдсөн тохиолдол.
Өчигдөр 14,035 хүнд шинжилгээ хийснээс 38 хүнээс коронавирус илэрчээ. БЗД-ийн голомтоос 36 хүний шинжилгээнд коронавирус илэрсэн байна. Сувилагч хоёр, үйлчлэгч нэг, сахиур зургаа, өвчтөн дөрөв, гэр бүлийн хавьтал 17 бусад хавьтал хоёр байна.
“ТЭНҮҮН-ОГОО” ХХК-ИЙН ЖОЛООЧ, ЧИНГЭЛТЭЙ ДҮҮРГИЙН ЦАГДААГИЙН ХЭЛТСИЙН АЖИЛТНААС КОРОНАВИРУСИЙН ХАЛДВАР ИЛЭРСЭН”
ХӨСҮТ-ийн Тандалт, судалгааны албаны дарга А.Амбасэлмаа: “Тэнүүн-Огоо” ХХК-ийн автобусны жолооч хийдэг хүнээс коронавирусийн халдвар илэрсэн. Энэ хүн хамгийн сүүлд ажилдаа арванхоёрдугаар сарын 24-нд очсон. Гэр бүлийнх нь хүн коронавирусийн халдвараар өвчилсөн учраас тухайн жолооч ойрын хавьтал байсан. БЗД-ийн нэгдсэн эмнэлгийн сахиур хүн халдвар аваад үргэлжлээд “Тэнүүн-Огоо” ХХК-ийн жолооч халдварт өртсөн.
“Тэнүүн-Огоо” ХХК-нд 90 гаруй жолооч байдаг. Чингэлтэй, Зунжин гэсэн хойд чиглэлд явдаг автобусны жолооч байсан учраас тэр чиглэлийн автобусны, ойрын хавьтлын 10 гаруй хүнийг тусгаарласан. Бусад хавьтлын 80 хүнээс шинжилгээ авсан. Арванхоёрдугаар сарын 20-24-ний өдрүүдэд тухайн автобусаар үйлчлүүлж байсан иргэд цэгүүдэд шинжилгээ өгөх шаардлагатай.
Чингэлтэй дүүргийн цагдаагийн хоёрдугаар хэлтсийн ажилтан халдварт өртсөн. Энэ хүн бол гэр бүлийнх нь хүн халдвартай байсан учир ойрын хавьтал гэж тусгаарлагдсан байсан. Арванхоёрдугаар сарын 21-нд хоёр дахь хавьтал гэж үзэн Чингэлтэй дүүргийн цагдаагийн хоёрдугаар хэлтсийн ажилтнуудыг шинжилгээнд хамруулсан. Тухайн үед ажилтнуудын шинжилгээнд коронавирус илрээгүй. Мөн өргөжүүлсэн байдлаар цагдаагийн хэлтсийн 254 хүнээс шинжилгээ авч байна” гэлээ.
