Эрүүл мэндийн яамнаас коронавируст халдварын нөхцөл байдлыг танилцууллаа.
“Өнгөрсөн 24 цагийн хугацаанд 41 хүнээс коронавирус илэрлээ. Ингэснээр Монгол Улсын хэмжээнд бүртгэгдсэн нийт тохиолдлын тоо 1,349 боллоо.
Үүнээс өнөөдрийн байдлаар 887 хүн эдгэрээд байгаа бол 451 хүн эмнэлэгт хэвтэн эмчлүүлж байна” хэмээн Эрүүл мэндийн яамны Ахлах шинжээч Д.Нарангэрэл мэдээллээ.
Мөн тэрбээр “ЗӨСҮТ-ийн хариу арга хэмжээний баг өчигдөр 17 обьектын 11,681 метр квадрат талбайд голомтын эцсийн халдваргүйтгэл хийлээ. Мөн тус төвийн Авто лаборатори Өмнөговь аймгийн Гашуунсухайт боомтод ажиллаж уртын тээврийн 49 жолоочид шинжилгээ хийхэд коронавирус илрээгүй.
Түүнчлэн НЭМҮТ-өөс коронавируст халдварын идэвхтэй харуулдан тандалт хийж буй. Уг харуулдан тандалтаар эрсдэлт бүлгийн хүн амаас гадна нийтийн тээвэр, такси, банк, худалдааны үйлчилгээний байгууллагын ажилчдыг хамруулж байгаа.
Өнгөрсөн хоёр хоногийн хугацаанд нийтдээ 2,000 гаруй хүнд шинжилгээ хийхэд нэг хүнээс коронавирус илэрсэн байна. Тусгай дугаарын долоон утсанд 24 цагийн хугацаанд 4,662 хүн холбогдож, зөвлөмж зөвлөгөө авчээ” гэсэн юм.
Эрүүл мэндийн яамны Ахлах шинжээч Д.Нарангэрэл: Шаардлагагүй тохиолдолд гадагш гарахгүй, хүний бөөгнөрөл үүсгэхгүй байхыг анхаарууллаа.
Тэрбээр “Их Британид коронавирусийн халдвар оргил үедээ хүрсэн талаар тус улсын Өвчин судлалын үндэсний төвөөс мэдээлжээ. Ингэж оргилдоо хүртэл нэмэгдсэн нь Европын улсуудад зул сарын баяр болсонтой холбоотой.
Түүнээс гадна АНУ-ын Калифорни мужид зул сарын баяртай холбоотойгоор өвчлөл их нэмэгдэж, эмнэлгийн орны ачаалал дийлдэхгүй болсон тул амьдрах чадвар муутай өвчтөнүүдийг эмнэлэгт авахгүй гэсэн дүрмийг мөрдөж эхэлжээ.
Баяр ёслол тэмдэглэж, гэртээ хүн урьсан тохиолдолд коронавирусийн халдвар өндөр тархаж байгааг Европын орнуудад болсон зул сарын баярын үйл явдал харуулж байна.
Иймд манай иргэд хүний бөөгнөрөл үүсгэхгүй байж, онц шаардлагагүй бол гадуур явахгүй байхыг анхааруулж байна” гэсэн юм.
ЭМЯ-ны ээлжит хэвлэлийн хурлын үеэр албаныхан сэтгүүлчдийн асуултад хариуллаа.
-“Ачтан” эмнэлгийн халдварын голомт хаанаас эхтэйг тогтоосон уу, өнөөдрийн байдлаар Улаанбаатар хотод эх үүсвэр нь тодорхойгүй халдварын хэчнээн голомт бүртгэгдээд байна вэ?
А.Амбасэлмаа: “Ачтан” эмнэлгийн голомт бол өргөн хүрээтэй. Шинжилгээний хариунууд гүйцэд гарч дуусаагүй байна. Халдварын эх уурхайг олох зорилгоор ажиллаж байгаа бөгөөд хэд хэдэн сэжүүр бий. Нягталж дуусаад та бүхэнд зарлана.
Тус эмнэлгийн ажилчдаас гадна батлагдсан тохиолдлын гэр бүлийн гишүүд халдварт өртсөн.
Улаанбаатар хотод эх уурхай нь тогтоогдоогүй 2, 3 голомт байгааг бид өмнө нь зарлаж байсан. “Мөнххада” компанийн голомтод нийт 17 тохиолдол бүртгэгдээд байгааг үргэлжлүүлэн судалж байна.
Нэг гэр бүл байсан. Тухайн гэр бүлийн халдварын эх уурхай тогтоогдож байгаа.
-ГССҮТ, Баянгол дүүргийн эрүүл мэндийн төвд сэжигтэй тохиолдол гарсан гэх мэдээлэл байна. Энэ талаар тодруулж мэдээлэл өгөөч?
-ГССҮТ болон БГД-ийн нэгдсэн эмнэлэг дээр “Ачтан” эмнэлгийн эмч нар очиж үйлчилгээ явуулсан учраас хавьтал гэж үзээд тухайн эмнэлгүүдэд байсан ойрын хавьтал болсон хүмүүсийг шинжилгээнд хамруулсан. 10 гаруй хүний шинжилгээнд урьдчилсан байдлаар халдвар илрээгүй байна. Ачтан эмнэлгийн эмч нар очсон учраас урьдчилан сэргийлэх үүднээс шинжилгээнд хамруулсан нь зөв арга хэмжээ. Тэдгээр эмнэлэгт очсон эмчийн шинжилгээний хариу мөн эцэслэж гараагүй байгаа.
Хаана ч халдвар гарах эрсдэлтэй болсон
Улсын хэмжээнд шалтгаан нь тодорхойгүй халдварууд гарна. Том дэгдэлтийн дараа олон хавьтлууд гадуур явж байгаа. Энэ үед ард иргэд маань өгсөн зөвлөгөө зөвлөмжийг мөрдөхгүй байна. Шинэ жилийг 2-3 гэр бүл нийлээд тэмдэглэх, баяр тэмдэглэхдээ гаднаас хүн авчирсан тохиолдлууд байгаа учраас халдвар гарах эрсдэлтэй. Хаана ч халдвар гарах эрсдэлтэй болсон гэдгийг анхааруулж хэлмээр байна.
-УОК-оос нэгдүгээр сарын 11-нээс хөл хориог сулруулах мэдээлэл өгсөн. Тэгвэл тэр хүртэл хугацаанд халдварын голомтыг хумьж амжих уу?
Д.Нарангэрэл: Дэлхий дахин цар тахалтай тэмцэхдээ хамгийн түрүүнд хөл хорио тогтоох, хөдөлгөөн хязгаарлах арга хэмжээг авч байна. Улс орон бүр халдварын тархвар судлал, хүн амын онцлогоос хамаараад өөр өөрөөр хөл хориог тогтоож байгаа.
Манай улсын хувьд удахгүй хөл хорио дуусна. Эмч хүний хувьд хөл хориог арай олон хоног үргэлжлүүлэх хувийн бодолтой байна. Гэхдээ ард иргэдийн аж амьдрал, ахуйтай холбогдуулан шийдвэр гарсан байх гэж бодож байгаа. Тархвар судлалын эмч хүний хувьд хэлэхэд энэ богино хугацаанд халдварын голомтуудыг хумих боломжгүй. Тиймээс ард иргэд маань эрүүл мэндийн байгууллагуудаас өгч буй зөвлөмжүүдийг дагаж байж халдварын эрсдэлээс сэргийлнэ.
