Монгол Улсын Ерөнхий сайд У.Хүрэлсүх БНЭУ-д үйлдвэрлэж байгаа “Ковид-19” цар тахлын эсрэг вакцинаас авах хүсэлтэй байгаагаа тус улсын Ерөнхий сайд Нарендра Модид илгээсэн албан захидалдаа илэрхийлсэн байна.
БНЭУ-аас Монгол Улсад суух Элчин сайд М.П.Сингх Ерөнхий сайдад бараалхаж Ерөнхий сайд Нарендра Модигийн хариу захидлыг танилцууллаа. Ерөнхий сайд Нарендра Моди цар тахлын эсрэг вакцин нийлүүлэхээр шийдвэрлэснээ захидалдаа тэмдэглэсэн байна.
Мөн БНЭУ-ын хөнгөлөлттэй зээлийн хүрээнд хэрэгжүүлж буй газрын тос боловсруулах үйлдвэрийн төсөл амжилттай урагшилж буйд баяртай байгаагаа онцгойлон илэрхийлжээ. Талууд вакцин нийлүүлэх хүрээнд өнөөдрөөс буюу 2020 оны 01 дүгээр сарын 19-ний өдрөөс 150 монгол эмчийг цахим сургалтад хамруулж эхэллээ.
Тээвэрлэлт, хадгалалт, вакцинжуулах ажил бэлэн болсон бөгөөд вакцины тоо хэмжээ, нийлүүлэх хуваарийг дипломат шугамаар тохиролцох юм.
Ерөнхий сайд У.Хүрэлсүх Монгол Улсад дэмжлэг үзүүлэхээр шийдвэрлэсэн стратегийн түнш, гуравдагч хөрш БНЭУ-ын Засгийн газарт чин сэтгэлийн талархал илэрхийллээ.
Дашрамд мэдээллэхэд Энэтхэг улсын Ерөнхий сайд Нарендра Моди 1,3 тэрбум гаруй хүнийг Ковидын эсрэг вакцинд хамруулах хөтөлбөрийг эхлүүлээд байгаа бөгөөд тэрээр өнгөрсөн бямба гаригийн өглөө "Бид дэлхийн хамгийн том вакцинжуулалтын аяныг эхлүүлж байгаа бөгөөд энэ нь дэлхийд бидний чадавхийг харуулж байна" гэж хэлсэн юм. Энхэтхэг улсын тухайд Эхний ээлжид эмнэлэг болон галын шугамд ажиллаж буй 30 сая хүнийг Оксфордын их сургууль, “AstraZeneca” компанийн хамтран гарган авсан вакцин болон “Bharat Biotech” компанийн гарган авсан вакцинаар дархлаажуулахыг зорьж байгаа . Энэхүү хоёр вакцины аль алийг Энэтхэг улс дотооддоо үйлдвэрлэж байгаа юм.
