Эрүүл мэндийн яам мэдээлэл хийлээ.
“Өчигдөр 18,871 хүний сорьцод шинжилгээ хийхэд 47 хүнээс коронавирус илэрлээ. Шинээр илэрсэн тохиолдлуудын ихэнх нь халдвар авсан хүмүүсийн ойрын хавьтлын иргэд байгаа бөгөөд шинээр хоёр голомтод халдвар бүртгэгдлээ.
Өнөөдрийн байдлаар улсын хэмжээнд бүртгэгдсэн коронавируст халдварын тохиолдол 2,120 боллоо гэдгийг ХӨСҮТ-ийн Тандалт, судалгааны албаны дарга А.Амбасэлмаа мэдээллээ.
Шинээр гарсан голомтуулдыг танилцуулбал,
- “Элизабет” хотхонд дөрвөн тохиолдол илэрлээ.
- “Си Жи Эс” эмнэлэгт найман тохиолдол бүртгэгдсэн.
Сүүлийн 24 цагт 53 хүн эдгэрч эмнэлгээс гарлаа.
Өнөөдрийн байдлаар Монгол Улсын хэмжээнд бүртгэгдсэн коронавируст халдварын тохиолдол 2,120 боллоо. Үүнээс 1,546 хүн эдгэрээд байгаа бол 561 хүн эмчлэгдэж байна.
Эмчилгээнд байгаа хүмүүсийн биеийн байдлыг үнэлбэл,
- Хөнгөн-476
- Хүндэвтэр- 80
- Хүнд- 4
- Маш хүнд- 1 хүн байгаа юм” гэв.
Дэлхий дахинд халдварын тархалт буурч байгаа сайн мэдээг ЭМЯ-ны ахлах шинчээж Д.Нарангэрэл хэллээ.
Тэрбээр “Сүүлийн 14 хоногт дэлхий дахинд коронавирусийн халдварын өвчлөл 15 хувиар буурсан мэдээтэй байна.
Манай улсын хувьд өвчлөл нэмэгдэж байгаа хэдий ч дэлхий дахин болон хөрш орнуудад маань өвчлөл тууштай буурч байгаа. Тухайлбал, ОХУ-д сүүлийн нэг сарын турш халдварын тархалт саарч, өдөртөө 4,000-5,000 тохиолдлоор буурч байна.
Өвчлөл буурч байгаа нь олон улс хөл хорионы арга хэмжээг үр дүнтэй авч хэрэгжүүлсэн, ард иргэд коронавируст халдварын талаар мэдлэг мэдээлэлтэй болсон нь халдварын тархалтыг буурахад нөлөөлсөн хэмээн үзэж байна. Түүнчлэн вакцины үр дүн гараад эхэлснийг онцолж байгаа.
Дэлхийн 73 орны 134 сая хүн вакцин хийлгэсэн. Өдөрт дунджаар 4.7 сая хүн вакцин хийлгэж байна. Өнөөдрийн байдлаар вакцинжуулалтад ард иргэдээ хамгийн сайн хамруулж байгаа улс нь Израйль улс бөгөөд одоогоор хүн амынхаа 50 орчим хувийг дархлаажуулжээ.
АНУ, Англид дархлаажуулалтын үр дүн гарч эхэлсэн талаар мэдээллүүд байгаа” хэмээн ярилаа.
