Бүтэн хоёр жил хаалгаа барьсан аж ахуй нэгжүүд дахин хөл хорио тогтоож чадахгүйгээ мэдэгдэн өнөөдөр нэр бүхий ресторан, хоолны газрууд заалаараа үйлчилж эхэлсэн. Иргэд ч үүнийг дэмжиж халдвар хамгааллын дэглэмээ барин үйлчлүүлэхээр урт дараалал үүсгэж эхэлсэн. Тиймээс НОК-оос ААН-үүдийн төлөөллүүдийг хүлээн авч уулзан дараах шийдэлд хүрсэн байна.
Маргаашнаас хоолны газар, кофе шоп, ресторанаар вакцины 2 тунтай хүн үйлчлүүлж болох шийдвэрийг НОК гаргалаа.
.НОК-ын дарга Д.Сумъяабазар: Төр тусгай зөвшөөрлийг тогтоох зүйл огт байхгүй. Жирэмсэн эмэгтэйчүүд, хүүхдүүд халдвар авч нөхцөл байдал хүндрээд байна. Хэдүүлээ нэг шийдэл гаргалгаа, дүрмээ тохиръё. Иргэд, ААН, төр аль аль нь хариуцлагатай байх хэрэгтэй. Манайхан ААН-үүдийг нээчихээр хэвийн юм шиг бөөнөөрөө бужигнадаг. Нийтийн хоолны үйлчилгээ эрхлэгч аж ахуйн нэгж, албан байгууллагуудтай “Хариуцлагын гэрээ” хийж дүрэмтэй болоод үйл ажиллагаагаа эрхлэх бүрэн боломжтой. Харин хууль дүрмээ биелүүлэхгүй бол хаах, тусгай зөвшөөрлийг цуцлах хүртэл арга хэмжээ авна. Эзэн биегүй болоод байгаа зүйлийн эсрэг гэрээний дагуу тохиролцож үйл ажиллагаагаа явуулж болно. Хариуцлага алдахгүй дэглэмээ мөрдөөд ажиллавал бид дэмжинэ” гэлээ.
