Соёлын яамнаас зохион байгуулж буй “Соёлын бүтээлч сар”-ын аяны хүрээнд “Яруу үдэш-2021” шинэ шүлгийн уншлага 2021 оны 11 дүгээр сарын 20-ны өдрийн 17:30 цагаас Novotel-ийн Ballroom-д болно.
Уран зохиолын боловсрол төвөөс санаачлан зохион байгуулж байгаа энэхүү шинэ шүлгийн уншлагад Монголын өнөө цагийн яруу найргийн өвөрмөц, содон өнгө аяс бүхий яруу найрагчдын төлөөлөл 21 яруу найрагч урилгаар оролцож, уран бүтээлийнхээ дээжээс хөгжим болон дүрслэх урлагийн шилмэл бүтээлүүдтэй хослуулан хүргэнэ.
Агуулга, хэлбэрийн шинэлэг эрэлхийлэл бүхий яруу найргийн бүтээлүүдийг сурталчлан таниулж, түгээн дэлгэрүүлэх “Яруу үдэш-2021” шинэ шүлгийн уншлагаар олон нийтийн урлагийн боловсрол, тэр дундаа уран зохиолын боловсролын түвшинг дээшлүүлэх, урлаг хоорондын уялдаа холбоог сайжруулах, яруу найргийн үнэ цэнийг нэмэгдүүлэхийн сацуу дэлхий нийтийг хамарсан цар тахлын хүнд хэцүү үед нийгмийн сэтгэл зүйг дэмжиж, иргэдийн урам зоригийг сэргээн хөгжүүлэх зорилготой юм.
Шинэ шүлгийн уншлагын үеэр оролцогч яруу найрагчдын уран бүтээлийн дээж болох шилмэл шүлгийн түүвэр хэвлэгдэж уншигчдын хүртээл болохоос гадна тэдний бүтээл туурвилыг гарын үсэгтэйгээр худалдан авах боломжтой.
